I fang etz dann echt als Wahrsager o! Weil i hob's ja g'sagt: Da Straub, der kriagt no mindestens oan Postn dazua. Und etz hot an scho. Etz is er nämlich Vorsitzender vom Parlamentskreis Mittelstand. Auf da andern Seitn hob i etz g'hert, dass er imma mitm Zug nach Minga foahrt. Und des versteh i wirklich net. Weil a Auto-Dandler, der Bahn foahrt, des is doch wia a Metzger, der wo koa Fleisch frisst. Naja, der werd scho seine Gründe hom. Angeblich ist der recht wichtig, der Parlamentskreis. I konn des ja net beurteiln, und aus mia werd ja eh nix mehr. Mei Muada, de is jednfalls nia zfriedn. I glaub, selbst wenn i Papst werdn tat, dann tat sie immer no song: Mei, Bua, des is ja wieda bloß a Stellvertreter-Job.