Also, i sogs eich, i war etz heit amal wieder im Pfahofara Stadtrat drin. De kocha fei a bloß mit Wasser, lebenswert hin oder her. Du, da gehts zerscht um Millionen für des Schul- und Sportzentrum und für des Eisstadion und nachat kummas do daher mit stingade Klos. Und da Kopetzky frogt doch glatt, ob ma auf dene neien Sportplätz an der Inglstädter Strass nachat zum Beispui auch ein "hochwertiges Spiel wie Deutschland gega Kamerun" austrong kannt. Geh, bitte! Deutschland gega Kamerun – hochwertig? Vom Fußball hot der definitiv koa Ahnung! Etz werd er als Literat natürlich song, des war doch bloß a Metapher. Ober do kriagt er dann vo mia scho wos zum hörn. Erschtns: Mit seine Fremdwörter konn er mir net imprägniern. Und zwoatns: Net alles, was hinkt, ist ein Vergleich.