Wahnsinn, oder? Lasst se da hiesige Obersozi Käser in Minga drom tatsächlich mitm Chef vo de bayerischen Grüna fotografiern. Des hätt’s doch früher ois net gem. De hom doch selba an Bayern-Chef, de Roten. Da dings…  Woaßt scho... Zefix, wia hoaßt etz der glei wieder... Mir fallt’s einfach net ei. Den kennt oba a wirklich koa Sau. Do konnst de ja wirklich liaba no mit der Konkurrenz knipsen lassn. Weil stellt’s eich vor, da Käser macht a Buidl mit dem bayerischen SPD-Chef und stellts ins Internet nei und nachat siehgt des irgendwo oana vo de Genossen und denkt se: Du, wer is etzat des neba dem Käser?