Weit weg vom Oli Kahn is de Haderthauer Christine fei nimma. Da Torwart-Titan hot doch seinerzeit g’sagt: „Wir brauchen Eier.“ Und des war fei ned zu Ostern. Und heit, grod zum Vatertag, schreibt unser Ministerin: „Enteiert mir die Jungs nicht.“ Mei Liaba, des is etz net grod vorsichtig formuliert. A wenn i ungern wem vo Inglstodt drin Recht gib – oba do hot's wirklich Recht! Weil des ned sei konn, dass de Weiba immer nach oben heiratn und nachat mauln, dass da Mo im Haushalt nix tuat. Sogt sie. Also, i fühl mi do sowieso net o'gsprocha, weil i mach ja wirklich vui im Haushalt. Wenn mei Oide zum Beispui vor lauter Putzn und Staubsaung schwitzt und fast zammbricht, nachat bring i ihra a Handtuach und an Drink mit Eis. Und wenn sa se recht obtuat mitm einatrong von de Bierkistln, dann bin i do a net a so – dann sog i natürlich zu ihra: Mei, geh hoit nachat zwoa Mal. Und i motivier sie – indem i si dro erinner, dass de leerg'suffan Bierkistn beim Außetrong ja wirklich nix mehr wiegn.