Mei, heit omds macht mei Oide an Schweinsbron, i gfrei me scho wia d'Sau! I friss me so voll und wenn i glaub, dass nix mehr neigeht, nachat nimm i mir no a Scheibm und an Knedl und zwoa Schöpfer voll Soß. Na, bitte seid's ma net bös, oba des is mir grod wirklich wurscht mit dem Aschermittwoch. I hob etz im Wahlkampf seit Wochen so vui glesn und g'hert, des wo weder Fisch noch Fleisch war, dass i scho fast Vegetarier bin. Oder sogar Veganer, weil tierisch guat war etz do a koane von dene Ideen.