Du, in Stoakircha gehts zua. Do denkst da nix und gehst zum Fasching amal als Dortmund-Fan und nachat haut dir a so a Brezen-Salzer a Flaschn drüber. Wahrscheinlich war des in Wirklichkeit a total eig'fleischter Bayern-Bene, der wo se bloß amal zum Fasching denkt hot, etz mach i mal den Błaszczykowski. Etz hob i natürlich a bisserl Angst, dass irgendoana , der wos halt a net checkt, dem Inderwies Wolfi oane aufstreicht. Weil bei dem is des ja scho ohne Fasching schwierig gnua, den Überblick zu b'haltn, wo er etz grod dazuag'hört. Er is praktisch der Ex-Freie-Wähler-Schwarze, der wo etz zu de Rotn g'wechselt is. Also, wenn der morgn beim Faschingstreibn aufm Hauptplotz a in am gelben Leiberl kummt, nachat fangt er se wahrscheinlich vo alle Seitn a poar ei.