I hob ja zerscht wirklich gmoant, des i a schlechter Wahlkampf-Scherz, wia i g'hert hob, dass da Herker de Fischerprüfung macht. So nach dem Motto: Weil als Roter konnst natürlich koa Schwarzfischer sei. Oder weil da Röder Verbrecher fangt, mecht er zumindest ab und zu a Köderfischerl außaziang. Oba i hob eam g'fragt und tatsächlich: Da Herker macht wirklich den Angelschein. I versteh des zwar net, weil der is doch no gor net so oid, do gibts doch no andere Freizeitbeschäftigungen, wo du net stundenlang dositzn muaßt und wartn, ob se wos rührt... Und außerdem is Angeln doch wirklich sau-fad. Etz amal Butter bei die Fische. I kenn im Grunde bloß oa Sach, de no langweiliger is wia Fischen: Beim Fischen zuaschaung.