Etz hommas nämlich scho, mit dem ganzen Lebenswert- und Nachhaltigkeits-Schmarrn. Auf oa Mal hot Pfahofa mehra Einpendler wia Auspendler. Etz wolln de plötzlich alle rei zu uns und nimma naus. Oba i mechat mei Ruah. Kapiert des denn koana. Etz muaß i wieda auspendln jeds Wochenend zum Schifoahrn, auf de hinterletzte Almhüttn, wo as Weizn acht Euro kost und da Leberkas zwölfe. Bloß, dass i dann fünf Minutn mein Friedn hob in da Sonn, bis mi da Erschte nachat wieda aus meim Mittogsschlaf reißt, weil er zufällig a aus Pfahofa kummt und moant, er muaß mi zualabern. Des kummt nämlich raus bei dem ganzen Schmarrn. Oba do denkt ja von dera bunten Koalition koana dro. Mir glangt's etz dann. I ziag nach Hettnshausen. Do host dei Ruah, seitdem do zwecks dem Weblinger Feld koana mehr mit dem andern redt.