So, etz hob i endlich alle Weihnachtsg'schenke beinand, de letztn hob i heit no fertig eipackt. I selba wünsch mia ja sowieso nix. Den ganzen Schmarrn mach i net mit. Des is doch bloß a ökonomische Mutation, der ganze Krampf. Weil des, wos i brauch, des kaf i mia selba, und wos i net kaffa konn, des brauch i net. Desmal hob i oba für a paar hiesige VIPs a G'schenk. Da Herker kriagt zum Beispui a DVD: "Highlander – Es kann nur einen geben." Da Woedl kriagt übrigens a an Fuim: "Der mit dem Wolf tanzt." Da Gürtner g'freit se bestimmt über an Miniatur-Bulldog, und zwar den Arion 500/600. Für den macht de Firma Claas nämlich Werbung mit dem Spruch: "Weil er's kann." Da Röder kriagt a Buach übern Gerhard Schröder. Des is zwar de falsche Partei, oba der hot damals a g'sagt: "Ich will hier rein." Und Schröder und Röder is eh fast des Gleiche. Für de ganze FDP hob i a Kartenspui. Also, i hob fünfe kafft, für jeds Mitglied oans: "Das Minderheiten-Quartett". Und da Müller vo Scheyern kriagt a Autogramm vom Mario Gomez, weil des is a a Knipser.