Du, do werns spitzn, de eig'foahrna Schwarzn, wenn der junge Moser von der JU in Kreistog neikimmt. Der werd eana as Gas sauba eistelln. Etz hot er ja scho mal den erstn Hammer auspackt: Junge Leit solln fürs Taxi im Landkreis bloß no de Hälfte zohln, den Rest soll da Landkreis blecha. Zwecks Mobilität in der Pampa, host mi? Do werns beißn, de oidn CSUler. Du, wenn de ganzn Junga im Landkreis den Moser a bloß desweng wähln, dann hockt der scho drin im Kreistog und nachat gehts auf. Jura studiert der a no, dem machst du nix vor. Und digitalisiern wui er den ganzen Landkreis. Spätestens do steing nachat de nächsten oidn Schwarzn aus. De wern nach der Wahl dahoam hocka und oide Schnulzn aus eanam Kofferradio hern und mit'm Rechenschieber auskarteln, wia vui Stimmen eana der Moser weggschnappt hot. Und er werd derweil per App den nächstn Clou verkündn. Laptop und Lederhosn, host mi?!