Ja, um Himmels Willen! Etz hot da Papst Franziskus wirklich dem Ober-Protzer Tebartz-van Elst an neien Job geb’m. Des is wirklich mal gelebte Nächstenliebe. I hoff etz bloß, dass des net Schule macht in er katholischen Kirch. Weil in Scheyern, do sans doch a so christlich zwecks dem Kloster. Am End kriagt do etzat da Ex-Burgamoasta Müller dann a wieder an Posten. Im Rothaus drin werds zwar wahrscheinlich nix mehr, weil do sitzt ja etz da Manfed Sterz drin und außerdem gibt’s do ja koa Rolltreppn. Oba bei irgend am Faschingsverein is doch bestimmt a Postn frei für oan, der se gern verkleidn tuat. Oder, no vui besser: Wia war’s als Vorstand von de Fotofreunde?