Mei, i bin ja wirklich a Depp! Hob i vorher bloß schnell im Vorbeigeh mitkriagt: „Bundesminister Dobrindt plant Warnsystem gegen Geisterfahrer.“ Hob i mir natürlich glei denkt: Dobrindt, Politik, Geisterfahrer – der wui etz wirklich wos gega de politischen Geisterfahrer macha! Do wissat i im Landkreis Pfahofa scho a paar, bei dene tats do ganz schee laut piepsn, des Warnsystem. I sog bloß Schwarzbau am Landratsamt. Oba der Dobrindt is ja Verkehrsminister und wui wos gega de echtn Geisterfahrer macha. Autobahn und so. Und do so i: Jawoll, des is wirklich höchste Zeit, dass do amal wos g’macht werd. Do hot’s erscht letzt’s Mal wieda Tote geb’m zwecks am Geisterfahrer. Desweng konnst du bloß song: Endlich werd do wos unternomma. Weil etz amal ohne Spaß: Jeder Unfall is oana z’vui. Und in Deitschland host du laut ADAC im Jahr zwischen 2400 und 2700 Geisterfahrer – und bei dene Zahln hom’s bestimmt net b’schissn. I bin mir bloß net sicher, ob a Warnsystem do g’langt – weil: Wos huift dir des, wenn oana verkehrt rum in’d Autobahn neifahrt und dann gibt’s an Alarm. Und bis du do wos macha konnst, hot’s schos kracht. Na, do brauchst du so Krallen im Bodn drin, dass des dem Geisterfahrer glei seine Reifen zamsticht und er gor net weida fahrn konn. Oder irgend so wos. A Geisterfahrer derf einfach net passiern in unserer moderna Zeit.